Renault Zoe er lítill bíll með nafn eins og kjölturakki en hann hefur nú verið í framleiðslu í sex ár við talsverðar vinsældir. Við síðustu áramót höfðu 133.000 eintök selst af þessum bíl á heimsvísu og 2015-16 var hann mest seldi rafmagnsbíllinn á Evrópumarkaði. Zoe rafmagnsbíllinn hefur nú fengið andlitslyftingu, en það sem er meira um vert er að hann hefur fengið nýja og langdrægari rafhlöðu. Auk þess verður hann líka með nýjum 134 hestafla rafmótor og hægt verður að fá hann með hraðhleðslu, sem að vísu er aukabúnaður sem kostar 140.000 kr. Fréttablaðið var með bílinn til reynslu á dögunum og þá aðallega í Intens útgáfunni þótt að bíllinn hafi einnig verið prófaður með minni rafmótornum.

Með andlitslyftingunni kemur bíllinn með nýjum díóðuljósum allan hringinn.
Myndir Tryggvi Þormóðsson.

Innréttingin er alveg ný í Zoe og hún er mun betri en í fyrr bíl. Hann er með meiri efnum í stað plasts og sumt af því er endurunnið. Til dæmis er efnið í mælaborði og hurðarspjöldum úr endurunnum gólfteppum og öryggisbeltum. Við prófuðum bílinn í Intense útfærslunni og þannig kemur hann með 9,3 tommu skjá sem hafður er upp á rönd svo hann passi við miðjustokkinn. Skjárinn er með Apple Carplay og Android Auto auk Íslandskorts. Bíllinn er nokkuð rúmgóður frammí með rúmgóðum sætum, en það sama á ekki við í aftursætum. Fótarými er af skornum skammti og maður rekur hnéin í framsætið. Eins er höfuðrými ekki gott og segja má að bara sé pláss fyrir tvo fullorðna. Kosturinn er þó að maður situr örlítið hærre en venjulega en í bíl af þessum stærðarflokki. Farangursrýmið er nokkuð rúmgott fyrir bíl í þessum flokki en það vantar varadekk.

Innréttingin í Intense útgáfunni er með tveimur stórum skjám og mikið af endurunnum hráefnum.

Með 134 hestafla rafmótornum er Renault Zoe ansi sprækur fyrir bíl í þessum flokki enda aðeins 7,1 sekúndu í hundraðið. Við gripum aðeins í 108 hestafla bílinn til samanburðar og þótt ekki muni miklu á upptakinu í byrjun finnst það betur þegar komið er á meiri hraða og í millihröðun. Einnig virkar hann þægilegri í akstri á þjóðvegi. Það er dáldið veglhjóð í bílnum þegar komið er á meiri hraða en á móti kemur að hann er hljóðlátur í bæjarakstri. Eina ljóður á hljóði er söngur í rafmótornum sem heyrist í kringum 25 km á klst, en að sögn Renault manna var það gert vísvitandi svo að bíllinn myndi ekki læðast upp að þér. Hægt er að slökkva á þessu hljóði af ökumanni. Þar sem að gluggar eru frekar háir er útsýni gott nema kannski gegnum afturrúðuna sem er í minna lagi, auk þess sem að þrír sórir höfuðpúðar skyggja á útsýnið. Þegar tekið er á bílnum finnst að hann er aðeins svagur á vegi og á það til að losa sig aðeins að aftan sem er óvenjulegt fyrir rafbíl.

Með nýja 134 hestafla rafmótornum er bíllinn sprækur af stað en líka léttur í þjóðvegaakstri.

Það sem skiptir mestu máli í dag í rafbíl er auðvitað drægnin og þar stendur Renault Zoe sig vel á blaði. Hann er gefinn upp með 383 km drægni með 134 hesafla mótornum og drægnin eykst í 395 km með þeim 108 hestafla samkvæmt WLTP staðlinum. Líkt og í öðrum rafbílum minnkar drægnin þegar kalt er í veðri og okkur gafs ágætis tækifæri til að reyna það í stuttri skotferð í sumarbústaðinn í eins stigs frosti. Í upphafi ferðar var áætluð drægni hans 215 km en hafði fallið niður í 68 km þegar komið var heim, nákvæmlega 100 km síðar. Drægnin hafði því farið niður um 147 km á 100 km en bíllinn var í þjóðvegakeyrslu mestallan tímann. Það var svo pínu kjánalegt að uppgötva að enginn hleðslukapall var í bílnum fyrir heimahleðslu en það er aukahlutur sem kostar 85.000 kr. Aðeins var snúra fyrir hraðhleðslustöð í bílnum en þar var hægt að hlaða hann í 80% hleðslu á rúmum klukkutíma með 50kW hleðslustöð.

Farangursrými er nokkuð gott fyrir bíl af þessari stærðargráðu eða 338 lítrar.

Það er erfitt að bera Renault Zoe við aðra bíla. Hann er minni en VW e-Golf en stærri en e-Up. Hann er líkari BMW i3 í tölum og er viðlíka búinn í dýrari útfærslum sínum. Segja má þó að helsta samkeppnin við Zoe sé handan við hornið. Mini Electric er væntanlegur í sölu í febrúar og Honda E kemur seinna á árinu en verður líklega með minni drægni. Þó að við vitum ekki verðið á þeim ennþá má búast við að þeir verði vel samkeppnihæfir. Þeir sem eru að skoða þennan bíl í dag eru eflaust líka að skoða stærri Nissan Leaf sem er 600.000 kr dýrari. VW e-Up er aðeins minni en Zoe og milljón ódýrari en drægni hans er aðeins 260 km. Drægni VW e-Golf er aðeins minni en e-Up eða 231 km samkvæmt WLTP staðli en ódýrasta útgáfa hans kostar 4.150.000 kr. Það fer því vel saman í Renault Zoe, gott verð og drægni enn sem komið er allavega.

Eins og sjá má gæti rými fyrir fætur verið betra og það fer aðeins sæmilega um tvo fullorðna afturí.

Kostir: Drægni, innrétting
Gallar: Pláss afturí, hleðslubúnaður aukabúnaður

Renault Zoe Intense
Rafhlaða:         52 kWh
Drægni:           383 km
Hestöfl:           136
Tog:                 245 Nm
0-100 km:        7,1 sek.
Hámarkshraði: 140 km
Farangursrými: 338 lítrar
Verð:               4.390.000 kr

16 tommu felgurnar eru staðalbúnaður í Zen útfærlsunni og koma vel út.