Peugeot hefur gengið vel í vali á bíl ársins í Evrópu á undanförnum árum. Peugeot 308 var valinn 2014 og Peugeot 3008 árið 2017. Það var talsverð bið að Peugeot 208 kæmist í hendur mínar, bíll ársins í Evrópu 2020. Hvernig skyldi nú bíllinn sem sigraði Tesla Model 3 í því vali reynast? Eitt af því sem gerði hann að sigurverara í valinu var sú staðreynd að hann er fáanlegur með þremur aflrásum, bensínvél, dísilvél og loks rafdrifinn eins og við fjöllum hér um. Að vísu tókum við líka í GT útfærslu með stærri bensínvélinni til að fá samanburðinn við rafbílinn.

Stýrið er lítið og nett til að skyggja ekki á mælaborðið sem er í augnhæð.
MYNDIR/TRYGGVI ÞORMÓÐSSON

Óhætt er að segja að Peugeot hafi tekist vel upp með útlit bílsins og langt síðan nýr smábíll hefur komið á markað með jafn sportlegar línur og þessi. Í GT útfærlu minnir hann helst á heitan GTI bíl frá því fyrir aldamót og þar er ekki leiðum að líkjast. Að framan eru díóðuljós með hvössum línum og 16-17 tommu felgur setja svip á þennan litla bíl. Merkilegt nokk að útlit bílsins er mjög svipað þótt um mismunandi útfærslur sé að ræða og þarf að hafa fyrir því að þekkja rafbílinn frá hinum. Að innan hefur Peugeot tekist sérlega vel upp og þá ekki bara með sportlegu yfirbragði heldur líka með frágang og efnisval. Eini ljóðurinn á smekklegri innréttingunni er upplýsingaskjárinn sem er nokkuð langt frá ökumanni og frekar þreytandi að nota. Hins vegar er þrívíddar mælaborðið skemmtilegt í notkun og skiptir um ham eftir notkun. Að sögn Peugeot hefur þrívíddarhönnunin þau áhrif að 0,5 sekúndur sparast af þeim tíma sem venjulegur notandi lítur á skjáinn. Það að hafa lokaða hvílu fyrir farsímann með þráðlausri hleðslu var vel til fundið og það er líka nóg af USB innstungum.

Plássið í aftursætum er ekki fyrir lengri ferðir með fullorðna og höfuðpúðar framsæta eru óvenju stórir og eignilega það eina sem að aftursætisfarþeginn sér.

Plássið er gott frammí nema setan er of stutt og styður ekki vel við fætur. Með sínu litla stýri eins og í öðrum Peugeot bílum líður manni fyrst eins og risa í dúkkuhúsi en svo venst það furðuvel. Afturí er plássið af skornum skammti og augljóst að bíllinn hentar frekar fjölskyldum með börn í yngri kantinum. Það vekur athygli að enginn munur er á plássi í rafbílnum þar sem að rafhlaðan notar plássið þar sem að bensíntankurinn og hvarfakúturinn var. Farangursrými er aðeins 265 lítrar sem er ekki mikið og nokkuð minna en hjá mörgum samanburðarbílum.

Farangursrými er 265 lítrar og taska fyrir týpu tvö af hleðslukapli fylgir með bílnum.

Í boði eru þrjár gerðir bensínvéla en Ísland fær ekki dísilvélina, enda aðeins áætlað að 5% sölu 208 bílsins sé í dísilvélinni. Allar bensínvélarnar eru 1,2 lítra, sú aflminnsta 75 hestöfl en um leið sparibaukur með 5,4 lítra meðaleyðslu. Næst kemur sparneytin 100 hestafla vél en fara þarf í dýrari GT útfærslu til að fá hann með sjálfskiptingu en þá er hann líka með 128 hestafla vélinni. Þriggja strokka bensínvélin er skemmtileg og laus við titring og hávaða þótt hún sendi sportlegar nótur frá sér þegar gefið er hressilega inn. Saman við góða átta þrepa sjálfskiptingu er bíllinn mjög skemmtilegur í akstri. Upptakið er gott þótt það vanti ennþá hálfa sekúndu uppá að hann nái e208 rafbílnum.

Rafmótorinn er allt að 136 hestöfl og skilar 260 Newtonmetra togi.

Helsti munurinn á rafbílnum og bensínbílnum í akstri er að rafútgáfan er 300 kílóum þyngri og það finnst vel í smábíl sem þessum. Það finnst að fjöðrunin er stífari til að ráða við aukna þyngd en þá er ekki þar með sagt að bíllinn sé eitthvað leiðinlegur í akstri. Hægt er að velja um þrjár akstursstillingar. Í Eco er hann 82 hestöfl og slekkur á miðstöðinni, í Normal er hann 106 hestöfl en fær 136 hestöfl þegar stillt er á Sport stillinguna. Skiptingin lítur eins út og í bensínbílnum nema búið er að bæta við B fyrir endurhlöðun rafhlöðu. Sú stilling virkar ekki eins áköf og í sumum rafbílum sem er kostur að mínu mati. Þótt upptakið sé gott er það heldur ekki eins kvikt og í mörgum rafbílum sem gerir hann líkari bíl með sprengihreyfli í akstri.

Það reynir á afturfjöðrun að gefa snöggt inn á rafbílnum enda er hann 300 kílóum þyngri en bensínbíllinn.

Samkeppnin er helst hjá hinum vinsæla Renault Clio og einnig í bílum eins og For Fiesta og Volkswagen Polo en hérlendis skipta bílar eins og Toyota Yaris líka máli. Verst er bara að enginn þeirra er boðinn rafdrifinn og þarf þá að skoða bíla eins og Renault Zoe og jafnvel rafdrifinn Mini til samanburðar. Hinn rafdrifni Zoe er á 4.190.000 kr í grunninn en með aðeins meira drægi. Renault Clio bensínbíllinn kostar frá 2.850.000 kr en Peugeot frá 2.650.000 kr sem er gott verð. Ford Fieasta kostar frá 2.990.000 kr og Toyota Yaris frá 2.790.000 kr. Fara þarf uppí GT útfærslu fyrir innbyggt leiðsögukerfi en á móti kemur að Apple CarPlay og Android Auto er staðalbúnaður. Í ódýrustu útfærslunni kemur hann aðeins á 16 tommu stálfelgum og bara með rafdrifnum rúðuupphölum að framan, sem er undarlegt í bíl sem kostar rúmar fjórar milljónir og er með staðalbúnaði eins og veglínuskynjara og umferðaskiltalesara. Kannski er helsta niðurstaðan sú að fyrir undir fjórar milljónir fæst hann í GT útfærslu með sjálfskiptingu og fullt af búnaði, 60 þúsund krónum ódýrari en rafbíllinn í grunnútfærslu sinni.

Peugeot e-208
Grunnverð:                 4.050.000 kr
Drægi:                         340 km
Hestöfl:                       136
Tog:                             260 Newtonmetrar
Hámarkshraði:            150 km
Upptak 0-100 km:       8,1 sek
Rafhlaða:                     50 kWh
Hleðsluhraði heima:   39 km/klst
Hraðhleðsla:                440 km/klst
L/B/H:                         4.055/1.745/1.430 mm
Hjólhaf:                       2.540 mm
Eigin þyngd:                1.455 kg
Farangursrými:           265 lítrar