Hver man ekki eftir lokaatriðinu í Back to hte Future, þar sem að Marty vaknar og hefur eignast draumabílinn, Toyota SR5 Extra Cab pallbíl. Það er dáldið þannig sem manni líður eftir að hafa prófað Ford Ranger Raptor, manni finnst maður hafa vaknað upp í annarri framtíð og maður spyr sig hvort þetta sé virkilega pallbíll, svo skemmtilegur er hann.

Dekkin eru 33 tommur og standa utar en á öðrum Ranger pallbílum.
MYNDIR/TRYGGVI ÞORMÓÐSSON

Fjörðunin er það sem aðgreinir hann frá öðrum svipuðum bílum og gerir hann að lúxusjeppa um leið og torfærutrölli. Meira er lagt í undirvagn og hann kemur á Fox Pro dempurum sem eru stillanlegir. Auk þess er hann með 150 mm meiri sporvídd en WildTrak og er með 30% meiri fjöðrunargetu. Búið er að henda burtu blaðfjöðrunum að aftan en í staðinn er komin fjölliða gormafjöðrun. Bíllinn er líka allur stærri en hefðbundinn Ford Ranger og einnig hærri, en undirvagninn hefur hækkað um 51 mm. Undir honum eru breið 33 tommu BFGoodrich torfærudekk með stífari hliðum á 17 tommu felgum. Annað sem aðgreinir hann frá öðrum pallbílum er að framstuðarinn er festur við grindina og er sérstök hlífðarpanna undir vélinni, auk dráttarlykkja.

Öflug tveggja lítra dísilvélin er í senn þýðgeng og eyðslugrönn og er með tíu þrepa sjálfskiptingu.

Það má næstum bjóða Ford Ranger Raptor hvað sem er, en meðal annars var farið með bílinn á illfæran og grýttan slóða. Um leið er hann með fæturna á jörðinni og er ekki spólandi í öllum beygjum á malbiki eins og aðrir jafn öflugir pallbílar myndu gera. Það er líka furðulétt að taka á stýri í jafn stórum bíl og Ranger Raptor er. Bíllinn kemur með sex akstursstillingum sem hafa áhrif á fjöðrun, stýri og skiptingar. Tveggja lítra vélin í Raptor er sú sama og í WildTrak og skilar hún 213 hestöflum sem gerir hann að öflugasta pallbílnum í þessum flokki. Hún er einstaklega skemmtileg með góðu togi, þýðgeng en jafnframt eyðslugrönn, en meðaleyðsla var rúmir 12 lítrar og það í engum sparakstri. Það er kannski helst vegna breytinganna á fjöðrun að hleðslugeta er aðeins 680 kíló í stað tonns, auk þess sem að dráttargeta hans lækkar um tonn, úr 3,5 tonnum í 2,5 tonn.

Að innan er bíllinn ekki mikið breyttur nema fyrir leðurinnréttingu og sportsæti.

Að innan er bíllinn ekki mikið breyttur þótt sjá megi alúð við smáatriði eins og bláan útsaum á leðri, og annars konar mælaborð. Bíllinn kemur með SYNC3 upplýsingakerfinu með níu tommu snertiskjá sem virkar mjög vel. Mælaborðið er frekar gamaldags með hefðbundnum mælum og litlum upplýsingaskjá, en sumum þætti þetta nú bara kostur. Sætin eru að vísu mjög góð og óvenju þægileg fyrir pallbíl. Vert að minnast á stigbrettin sem eru verkleg og breið þannig að maður getur í alvörunni notað þau.

Það var ekki hægt annað en að finna veg með góðum árfarvegi til að prófa nýjan Ford Ranger Raptor.

Það sem maður ætti helst að spyrja sig við ákvörðun á kaupum á Ranger Raptor er hvort að hann sé þess virði að borga 2.900.000 kr meira fyrir Raptor merki frekar en WildTrak. Báðir koma með hinni frábæru TDCI dísilvél sem skilar 213 hestöflum og er pöruð við tíu þrepa sjálfskiptingu. Ef munurinn væri bara útlitspakkinn væri verðmunurinn alltof mikill, en maður fær aldleilis meira en það. Fjörðunin er það sem aðgreinir þessa bíla og rúsínan í pylsuendanum eru þægilegustu sportsæti sem undirritaður hefur prófað lengi.

Ranger Raptor er bæði láðs og lagarbíll ef svo má að orði komast. Loftinntakið er eins ofarlega og hægt er upp undir vélarhlífinni.

Ford Ranger Raptor
Grunnverð:                 11.190.000 kr
Vélarstærð:                 1.996 rsm
Hestöfl:                       213
Tog:                             500 Newtonmetrar
Upptak 0-100 km:       10,5 sek.
Hámarkshraði:            170 km.
CO2:                            281 g/km
L/B/H:                         5.363/2.180/1.873 mm
Hjólhaf:                       3.220 mm
Eyðsla bl. ak:               10,8 lítrar