Litli rafbíllinn frá Volkswagen er nú kominn með helmingi stærri rafhlöðu og drægi sem bætir 100 km við. Það gerir hann næstum samkeppnishæfan við bíla eins og Renault Zoe, en bara næstum því, þar sem Zoe kemst mun lengra á hleðslunni. Það skemmtilega við rafbíla Volkswagen hingað til er að þeir hafa búið til rafútgáfur af tegundum sem fólk þekkir og treystir. Það er þó allt að fara að breytast með algerlega nýjum rafbílum sem eru smíðaðir frá grunni sem slíkir. VW e-Up er það ekki en athylgisverður samt sem áður fyrir margt.

Mælaborðið í grunnútgáfunni er einfalt að gerð og ofan á miðjustokkinum er karfa fyrir snjallsíma. MYNDIR/TRYGGVI ÞORMÓÐSSON

Þegar maður sest bak við stýrið á e-Up rafbílnum líður manni í smástund eins og um bensínbíl sé að ræða. Það er hefðbundinn lykill sem þarf að snúa til að ræsa bílinn og handbremsan er meira að segja af gömlu gerðinni. Satt best að segja er búnaðurinn frekar fátæklegur í grunngerðinni þótt sjá megi veglínuskynjara og upphituða framrúðu. Hann er búinn einfaldasta upplýsingakerfi sem völ er á, en fara þarf í Style útfærslu til að fá vel búinn bíl. Þá bætast líka við fjarlægðarskynjarar, bakkmyndavél, hraðastillir, aðgerðarstýri, díóðu innilýsing, betri hljómtæki og tvílitur. Ofan á miðjustokki er karfa fyrir snjallsíma til að hægt sé að nota leiðsögukerfi gegnum smáforrit. Rýmið í bílnum frammí er nokkuð gott og sætin þægileg miðað við bíl af þessari stærð. Plássið minnkar eftir því sem aftar er farið og farangursrými er aðeins 251 lítri, sem þó er það sama og í bensínbílnum.

Rafmótorinn er 81 hestafl sem er ekki mikið en þó 22 hestöflum meira en bensínvélin.

Rafhlaðan í e-Up bætir næstum 300 kílóum við eigin þyngd bílsins miðað við bensínútgáfuna, en hún er líka bara um 60 hestöfl. Rafbíllinn er miklu frískari að keyra þrátt fyrir aukna þyngd og maður verður bara var við hana þegar bílnum er ekið á hraðahindrun eða of skarplega í beygju. Bíllinn virkar nokkuð snöggur af stað en þar sem að hámarkshraðinn er aðeins 130 km er millihröðunin þannig að maður hugsar sig um áður en að maður reynir framúrakstur. Á meðan reynsluakstrinum stóð þurfti að skreppa til Hveragerðis og það þótti tilvalið til að reyna á raundrægi bílsins. Hellisheiðin reynir á þann þátt með brekkum og vindi þannig að flestir bílar hafa tapað meira drægi en þeim 44 km sem leiðin er. Merkilegt nokk, eftir aksturinn fram og til baka var bíllinn aðeins búinn að tapa 100 km af drægi sínu sem verður að teljast nokkuð nærri lagi, og eitthvað sem hægt er að treysta á. Þar að auki bætti hann 7 km við drægi sitt eftir að bremsuhleðslan hafði unnið fyrir sínu á leið niður Kambana. Bíllinn var keyrður í Eco á leiðinni sem er millistig sem slekkur á hlutum eins og miðstöð.

Farangursrými er 251 lítri sem er þokkalegt í samanbuðri við keppinautana.

Það má bera VW e-Up saman við aðra bíla á tvo vegu. Í fyrsta lagi mætti bera kaup á honum saman við kaup á bensíndrifnum VW Up sem líklegast myndi kosta eitthvað svipað hérlendis eða tæplega það. Vandamálið er bara að þannig útgáfa er ekki lengur í boði á verðlista Heklu. Hins vegar má reyna að finna aðra rafbíla af minni gerðinni og bera saman við hann út frá þáttum eins og verði og drægi. Renault Zoe er það sem manni dettur fyrst í hug en hann kostar 4.450.000 kr og hefur 383 km drægi. Bíll sem hefur svipað drægi af svipaðri stærð er Mini Cooper SE sem kemst 270 km á hleðslunni og kostar frá 4.690.000 kr. Loks er Honda e væntanlegur með 220 km drægi en hann kostar frá 4.290.000 kr. Ljóst er því að enginn rafbíll af minni gerðinni keppir við verðið á VW e-Up sem kostar aðeins 2.990.000 kr og aðeins þarf að bæta við 360.000 kr til að fá mjög vel búinn bíl í Style útfærslu.

Volkswagen e-Up er einfaldur bíll á að líta og nánast eins og bensínbíllinn í útliti.

VW e-Up
Grunnverð:                 2.990.000 kr
Hestöfl:                       82
Tog:                             210 Newtonmetrar
Hröðun 0-100 km:      11,9 sek
Hámarkshraði:            130 km/klst
Rafhlaða:                     36,8 kWst
Drægi:                         260 km
Hraðhleðsla 80%:        1 klst
Hleðslutími 230V:       16 klst 15 mín
L/B/H:                         3.600/1.645/1.492 mm
Hjólhaf:                       2.417 mm
Veghæð:                     135 mm
Farangursrými:           251 lítri
Eigin þyngd:                1.247 kg.