Jepplingsheilkennið ætlar að festast við marga bíla um þessar mundir og sá síðasti til að falla undir þá skilgreiningu er ný útgáfa Jazz sem kallast Crosstar. Reyndar eru það helgispjöll að setja nafn með orðinujeppi við bíl sem þennan enda aðeins um bíl með framdrifi að ræða, líkt og margir slíkir í dag. Að vísu er hann með meiri veghæð en hefðbundinn Jazz og eitthvað er búið að eiga við útlitið til að gera hann sportlegri, með meiri plasti og þakbogum.

Mælaborðið er stílhreint og þá sérstaklega notendavænn upplýsingaskjárinn.

Þótt að í grunninn sé hér Honda Jazz er bíllinn örlitið stærri en áður. Hann er 30 mm hærri enda búið að hakka hann á fjöðrun um 37 mm. Hann er 31 mm breiðari og 46 mm lengri vegna plasthlífanna sem utan á honum eru. Að innan er bíllinn nánast alveg eins. Að vísu eru sætin með öðrum efnum sem auðvelda hreinsun og það er komið betra hljómkerfi. Upplýsingakerfið er nýtískulegt og er einfalt í notkun og býður bæði uppá Apple CarPlay og Android Auto. Þrátt fyrir að í grunninn sé þetta smábíll er Crosstar furðu rúmgóður og þar sem að hann er hærri en hefðbundinn Jazz er þægilegra að umgangast hann. Hurðir opnast vel og það þarf ekki að setjast mikið niður í bílinn. Hann er rúmgóður að innan miðað við bíl í þessum flokki og munar þar mest um höfuðrými. Margar sniðugar útfærslur eru í innanrými, eins og tvöfalt hanskahólf og glasahöldur við A-bita í stað þess að vera að flækjast fyrir höndum ökumanns í miðjustokki. Sem betur fer er ennþá hægt að taka upp setuna í aftursætum Jazz sem að getur auðveldað flutninga á stærri hlutum. Vel fer um tvo fullorðna í aftursætum, en sá þriðji má ekki vera stór til að komast fyrir á bríkinni milli þeirra.

Eins og sjá má veldur aukin veghæð að bíllinn leggst meira á hprnin en samt er hann furðu stöðugur í akstri.

Eins og er á Honda Jazz Crosstar fáa sem enga nána keppinauta hérlendis þar sem að Ford Fiesta Active er ekki í boði hjá Brimborg þótt stóri bróðir Focus Active sé það. Crosstar er aðeins boðinn í EX útfærslu og kostar nokkra summu, eða 4.490.000 kr sem er 240.000 kr meira en Jazz í EX útfærslu. Hvort fólk sé tilbúið að borga þá upphæð fyrir meiri veghæð og þakboga er svo annað mál. Jazz er með mjög tryggan kaupendahóp enda kaupa 60% eigenda Jazz sér annan Jazz aftur, og þá því ekki Crosstar?

Vél og rafmótorar gefa samtals 253 Newtonmetra tog sem er allgott.

Kostir: Upplýsingakerfi, höfuðrými, útsýni
Gallar: Pláss fyrir miðjufarþega, verð

Honda Jazz Crosstar
Rúmtak:                      1.498 rsm
Grunnverð:                 4.490.000 kr
Hestöfl:                       108
Tog:                             253 Newtonmetrar
Eigin þyngd:                1.325 kg
0-100 km:                    9,9 sek
Hámarkshraði:             172 km/klst
CO2 gildi:                    110 g/km
Eyðsla bl. ak:               3,9 l
L/B/H:                         4.090/1.725/1.556 mm
Hjólhaf:                       2.520 mm
Farangursrými.            298 l

Farangursrými er rétt tæpir 300 lítrar en aðvelt er að fella niður sæti og fá flatt gólf.