Svona til að byrja með er gott að útskýra aðeins hvað nafnið MG ZS EV stendur fyrir. MG er merki framleiðanda sem var betur þekktur fyrir framleiðslu sportbíla á sjöunda áratugnum. Merkið er nú í eigu kínversku samsteypunnar SAIC sem að hefur hafið mikla markaðsherferð með nafnið í Evrópu. ZS er upphaflega bíll með brunahreyfli og varla einu sinni jepplingur því að hann er aðeins boðinn með framdrifi. EV viðbótin kemur þegar bílnum er breytt í hreinræktaðan rafbíl á grunni gamla bílsins. Þar sem að hann er nánast óbreyttur í útliti þýðir lítið hjólhafið það að rafhlaðan er aðeins 44,5 kWst sem að dugar honum fyrir 263 km akstur.

Útlit MG ZS EV er nánast eins og á fyrri útgáfu með brunahreyfli og því er skögun meiri og hjólhaf í minna lagi. MYNDIR: TRYGGVI ÞORMÓÐSSON

Ólíkt mörgum rafbílum er MG ZS EV enginn kraftabíll og upptakið svipað og í meðal fólksbíl.

Hann er líka fyrsti rafbíll sem undirritaður hefur prófað sem að spólar ekki við snögga inngjöf. Stýrið veitir ekki mikla tilfinningu, en hægt er að velja um þrjár akstursstillingar á stýri sem gefa ekki svo mikinn mun. Auk þess er hægt að segja það sama um endurhleðsluna á bremsum sem er með þrjár stillingar, sem gefa ekki mikinn mun í akstri. Það er eins og vanti aðeins uppá fjöðrun bílsins sem mætti vera stífari, svo að ekki er eins skemmtilegt að keyra þennan eins og margan rafbílinn. Á móti kemur að bíllinn er í léttara lagi af rafbíl að vera. Loks verður ekki komist hjá því að nefna sérstaklega afskiptasamur akreinavara sem hendir bílnum til á akrein ef að ökumaður vogar sér hálfan metra frá vegbrún.

Búnaður er veglegur í Luxury útfærslu en takið eftir hvað ökumaður þarf að teygja sig í stýrið.

Í samanburði við nýrri rafbíla er helst að MG ZS EV líði fyrir samanburð á drægi, en ekki verði. Helstu keppinautar hans væru nýkominn Peugeot e-2008 eða Hyundai Kona með minni rafhlöðunni. Drægi MG bílsins er 263 km með 44 kWst rafhlöðu en Peugeot e-2008 er með 320 km drægi og Hyundai Kona með 39 kWst rafhlöðunni 289 km. MG ZS EV er aðeins fyrir 50 kW hleðslustöð sem þýðir að hann er 40 mínútir að fara uppí 80% hleðslu á CCS hleðslustöð. Verðið er hins vegar MG bílnum í hag og vel það. Hann kostar frá 3.990.000 kr og Luxury bíllinn 4.390.000 kr sem er ansi gott. Hyundai Kona kostar 5.290.000 kr í Comfort útgáfu með minni rafhlöðunni og Peugeot e-2008 kostar frá 4.650.000 kr í sinni ódýrustu útgáfu. Hægt er að fyrirgefa honum nokkra smágalla fyrir þennan mun á verði, en hann er um milljón krónum undir sambærilegri samkeppni þessara keppinauta.

Þrátt fyrir hjólhaf í minna lagi opnast hurðir vel og fótapláss er bara nokkuð gott.

Kostir: Verð, farangursrými, búnaður
Gallar: Hitamælir, miðstöð, enginn aðdráttur á stýri

Grunnverð:                 3.990.000 kr   
Hestöfl:                       143
Tog:                             353 Newtonmetrar
0-100 km/klst:            8,5 sek
Hámarkshraði:            140 km/klst
Rafhlaða:                     44,5 kWst
Drægi:                         263 km
L/B/H:                         4.314/2.048/1.620 mm
Hjólhaf:                       2.579 mm
Farangursrými:           470 lítrar
Eigin þyngd:                1.502 kg

Fjöðrunin er einu númeri of lítil fyrir þennan eins og hálfs tonna bíl og hann leggst því nokkuð í beygjurnar.