Það vakti athygli þegar Honda ákvað að koma með rafbíl á markað í fyrsta skipti og færa sig þannig inn í öld rafbílanna. Bíllinn var frumsýndur í fyrra og er nú kominn til landsins og í sölu hjá nýjum höfuðstöðvum Honda að Krókhálsi.

Breiðtjaldið innandyra samanstendur af tveimur 12,3 tommu upplýsingaskjám, skjá fyrir mælaborð og tveimur myndavélaskjám fyrir hliðarmyndavélar.
MYNDIR: TRYGGVI ÞORMÓÐSSON

Honda e ætlar sér greinilega að fara óhefðbundnar leiðir með þessum bíl sem er hannaður með útliti Honda Civic frá áttunda áratug fyrri aldar. Ekki bara það heldur á hann sér fáa keppinauta og er meira hugsaður sem borgarsnattari heldur en bíll sem leysa eigi allar þarfir nútímafjölskyldunnar, eins og margir bílar í dag virðast ætla að gera. Fyrir það fyrsta er bíllinn aðeins fjögurra sæta sem er óvenjulegt. Afturhurðir bílsins eru mjög aftarlega og með ólíkindum að Honda hafi náð að koma þeim fyrir. Það kemur manni á óvart að bíllinn sé fjögurra dyra því hann virkar lítill utanfrá eins og tveggja dyra. Munar þar um mikið hjólhaf fyrir ekki stærri bíl en það er 2.530 mm. Til samanburðar má nefna að hjólhaf fyrstu kynslóðar Civic var aðeins 2.200 mm.

Myndavélarnar taka ekki mikið pláss og gera bílnum kleift að smeygja sér víða.

En hvernig bíll er Honda e undir niðri? Hann er með 152 hestafla rafmótor og frekar lítilli rafhlöðu sem rúmar 35,5 kWst. Rafmótorinn er settur á afturdrifið og fjöðrunin er sjálfstæð allan hringinn. Fyrir vikið er ekki mikið fyrir framhjólunum og auðvelt að leggja mikið á bílinn og reyndar er snúningshringurinn sá minnsti sem undirritaður hefur prófað í nokkrum bíl, eða aðeins 8 metrar. Þar sem bíllinn er afturhjóladrifinn vill hann því aðeins yfirstýra í kröppum beygjum ef gefið er of snöggt inn. Því kemur sér vel að stýrið er fljótt að taka við sér enda talsvert dobblað. Stýrishjólið sjálft er tveggja arma og er einstaklega þægilegt í notkun og góð tilbreyting frá fjögurra arma stýrishjólum með takka alls staðar. Drægi bílsins er aðeins 220 km sem stenst engan veginn samanburð við helstu samkeppnisaðila og er einn af helstu göllum bílsins.

Útlit bílsins er skemmtileg blanda af gamaldags línum og nýmóðins áherslum.

Að setjast inn í bílinn er ekki eins erfitt og ætla mætti og er reyndar bara þægileg upplifun, ef talað er um framsætin. Þar er gott fótapláss og óvenju stór og þægileg sæti fyrir þessa stærð af bíl. Hins vegar er plássið af skornum skammti afturí fyrir höfuð og sér í lagi fætur og þá sérstaklega við inn- eða útstig. Reyndar fer ágætlega um meðalstóran mann í sætinu þegar hann er búinn að koma sér fyrir enda þarf ekki að keppa um pláss við neinn miðjufarþega. Farangursrýmið er mjög lítið og dugir kannski fyrir leikfimistöskuna en ekki meira. Útsýni út úr bílnum er þrælgott miðað við marga bíla í dag. Hann er búinn myndavélum í staðinn fyrir hliðarspegla og er maður furðu fljótur að venjast því að horfa ekki lengur út fyrir bílinn til að horfa aftur. Helsti kosturinn við þann búnað er hversu vel sést inn annars svokölluð blind svæði, sem er nanast útrýmt með þessum búnaði.

Kringlótt framljósin eru óhefðbundin og minna dáldið á fyrstu kynslóð VW Golf.

Ekki verður skrifað um Honda e án þess að minnast á upplýsingaskjái sem ná óslitið milli myndavélskjánna og mynda óslitna heild litaskjáa eftir bílnum þverum. Auðvelt er að nota skjáina og fáir takkar þar fyrir utan til að flækja málin enn frekar, en notkun og fletting getur virkað aðeins seinvirkari en maúr á að venjast. Í raun og veru er um tvo 12,3 tommu upplýsingaskjái að ræða auk skjá fyrir mælaborðið. Sjötti skjárinn er svo í baksýnisspeglinum, kjósi kaupendur að velja dýrari gerð bílsins. Hægt er að nota skjáinn lengst til vinstri sem afþreyingarskjá fyrir farþegann. Kerfið styrður Apple Carplay, en það tekur yfir upplýsingar eins og hvað er eftir af drægi þegar það er í notkun.

Farangursrýmið er aðeins 171 lítri og varla til meiri afkasta en að leggja frá sér leikfimistöskuna.

Það er erfitt að bera Honda e saman við aðra rafbíla og kemur þar margt til. Hann hefur verið gagnrýndur fyrir verðið sem er nálgast verð á nýjum og mun stærri VW ID.3 en er reyndar aðeins ódýrari hér en erlendis í þeim samanburði. Helstu samkeppnisaðilar hans eru Mini Electric, Peugeot e-208 og Renault Zoe en þeir eru undir sömu sök seldir, að vera einu númeri of dýrir miðað við stærri gerðir rafmagnsbíla. Af þeim þremur er Mini Electric bestur til samanburðar enda sækja þeir báðir í sömu nostalgíuna. Verðið á þeim er svipað en Mini kostar frá 4.950.000 kr. Það sem aðgreinir þá er hinn fullkomni tæknibúnaður sem er fyrir hendi í Honda e og gerir bílinn að þeirri söluvöru sem hann er. Zoe og e-208 eru ódýrari en Mini en Renault bíllinn kostar frá 4.450.000 kr og sá franski frá 4.390.000 kr, sem er í raun og veru það sama og grunnverð Honda e. Það má því segja að Honda e standi sig vel í samkeppni á verði sambærilegra rafbíla.

Höfuðpláss og sérstaklega fótaspláss er af skornum skammti afturí.

Kostir: Tæknibúnaður, lipur, liggur velGallar: Drægi, farangursrými, fótapláss afturí

Honda e
Grunnverð:                 4.390.000 kr.
Rafhlaða:                     35,5 kWst.
Rafmagnsnotkun:       18-20 kWst/100 km
DC hleðsla:                  100 kW
Hestöfl:                       154
Tog:                             315 Newtonmetrar
Drægi:                         220 km.
Hröðun 0-100 km:      8,3 sek.
Hámarkshraði:            145 km/klst.
L/B/H:                         3.894/1.752/1.512 mm
Hjólhaf:                       2.530 mm.
Farangursrými:           171 l.
Eigin þyngd:                1.518 kg.