Það eru eflaust margir aðdáendur hins vinsæla Toyota RAV4 búnir að bíða eftir komu PHEV útgáfunnar til landsins. Kraftmiklir jepplingar í tengiltvinnútgáfum eru góð söluvara þessa dagana on er RAV4 PHEV engin undantekning. Bíllinn er einn sá krafmesti sem í boði er í þessum flokki og er það aðeins Toyota Supra sem státar af meira afli hjá merkinu.

Að koma með RAV4 sem PHEV er ekki aðeins það að bæta við hann aðeins stærri rafhlöðu. Tengiltvinnútgáfa RAV4 er búinn 2,5 lítra vélinni annars vegar sem skilar í þessari útfærslu 185 hestöflum auk 134 kW rafmótor að framan og 40 kW á afturdrifi. Samtals skilar bíllinn því 306 hestöflum þegar báðar aflrásirnar eru notaðar, en það dugar til þess að bíllinn er aðeins sex sekúndur í hundraðið. Þótt að aflið komi sér vel þegar á þarf að halda er það í raun og veru hversu mikill rafmagnsbíll hér er á ferðinni sem skiptir máli.

Frammí bílnum er öflugri útgáfa 2,5 lítra bensínvélarinnar og 134 kW rafmótor.
MYNDIR: TRYGGVI ÞORMÓÐSSON

RAV4 PHEV hefur 75 km drægi á rafhlöðunni samkvæmt WLTP staðlinum sem er mjög gott fyrir tengiltvinnbíl. Auk þess er bíllinn alltaf stilltur á 100% rafdrif þegar akstur hefst og þarf að stilla hann sérstaklega á aðra aksturhami. Aksturstillingarnar eru fjórar, en auk EV stillingarinnar, er svokölluð Auto stilling sem notar rafmótorinn aðallega en bætir við bensínvélinni þegar þörf er á. Í Hybrid stillingunni er bíllinn stilltur á hámarksafköst á báður aflrásum og með hleðslustillingu gegnur bíllinn á bensínvélinni eingöngu á meðan hún hleður einnig rafhlöðuna. Þegar bíllinn kveikir á bensínvélinni í akstri takmarkar hann afl hennar fyrstu tvær mínúturnar meðan hún er köld.

Í mælaborðinu koma fram upplýsingar um eyðslu rafmagns eða bensíns eftir notkun.

Að sjálfu sér er ekki mikill munur á hefðbundnum útgáfum RAV4 og PHEV útgáfu, hvorki útlitslega eða í rými bílsins. Bíllinn er sá fyrsti frá Toyota sem að notar MyT appið sem gefur möguleika á að fjarstýra miðstöð eða fylgjast með hleðslu rafhlöðunnar. Plássið er jafngott og áður og aðeins munar á farangursrými þar sem gólfið hefur verið hækkað um 35 mm og er nú alls 520 lítrar. Að vísu er RAV4 PHEV 260 kílóum þyngri og það finnst aðeins í akstri, en þyngsta gerð tvinnútgáfu bílsins er 1.720 kg. Það er helst að það skipti máli í aksri á malarvegi þar sem hann er talsvert hastari en bensínbíllinn. Að öðru leyti virkar hann mjög svipaður í akstri og er ef eitthvað, aðeins hljóðlátari enda þurfti að leggja meira í hljóðeinangrun í rafbílnum. Minnir akstur RAV4 PHEV meira á rafbíl en tengiltvinnbíl að mörgu leyti.

Þar sem að RAV4 PHEV er talsvert þyngri finnst að hann er aðeins hastari á möl.

Helsti keppinautur Toyota RAV4PHEV er líklega Peugeot 3008 PHEV en hann er 300 hestöfl með allt að 59 km drægi á rafhlöðunni. Í 300 hestafla útgáfunni kostar hann frá 6.930.000 kr á móti grunnverði RAV4 PHEV sem er 1.5 milljónum hærra. Er það auðvitað ansi mikill munur í þessum flokki. Aðrir væntanlegir samkeppnisaðilar eru Kia Sorento PHEV og Hyundai Tucson PHEV en þeir koma ekki til landsins fyrr en á næsta ári.

Kostir: Afl, drægi, hljóðlátur
Gallar: Verð, hastur á möl

Toyota RAV4 PHEV
Grunnverð:                 8.550.000 kr
Hestöfl:                       306
Tog:                             Nm
Hröðun 0-100 km:      6 sek
Eyðsla l/100 km:         1,2 í bl/ak
CO2 g/km:                   22
Drægi rafhlöðu:          75 km
Hámarkshraði EV:       135 km
Rafhlaða:                     18,1 kWst
Eigin þyngd:                1.980 kg
Farangursrými:           520 l.